Fframweithiau sefydliadol, polisi ac economaidd – Gweithredu’r llywodraeth

Camau gweithredu Llywodraeth y DU

• Yn ei chyllideb ym mis Mawrth 2021, cyhoeddodd Llywodraeth y DU fesurau i fynd i’r afael ag anghydraddoldebau rhanbarthol, gan gynnwys Cronfa Codi’r Gwastad, a fydd yn canolbwyntio ar fuddsoddiad cyfalaf mewn seilwaith lleol sy’n cael effaith amlwg ar bobl a’u cymunedau. Ym mis Mai 2021, cyhoeddodd Llywodraeth y DU y byddai Cynghorydd Codi’r Gwastad yn cael ei benodi a bod cynlluniau i gyhoeddi Papur Gwyn Codi’r Gwastad yn ddiweddarach yn 2021.
• Ym mis Mawrth 2021, lansiodd Llywodraeth y DU ei phrosbectws ar gyfer Cronfa Adfywio Cymunedol y DU hefyd, sydd â’r nod o gau’r bwlch rhwng diwedd cronfeydd strwythurol yr UE a dechrau Cronfa Ffyniant Gyffredin y DU a ddaw yn eu lle.
• Ym mis Awst 2020, agorodd Llywodraeth y DU ymgynghoriad penodol ar gryfhau cyrff craffu annibynnol drwy ddeddfwriaeth, er mwyn gwella atebolrwydd yn y system cyfiawnder troseddol.
• Ym mis Gorffennaf 2020, sefydlodd Llywodraeth y DU Gomisiwn newydd ar Wahaniaethau Hil ac Ethnig i adolygu anghydraddoldeb yn y DU a gwneud argymhellion ar gyfer camau gweithredu pellach ar draws Llywodraeth y DU, cyrff cyhoeddus a’r sector preifat. Cyhoeddodd y Comisiwn hwn ei adroddiad ym mis Mawrth 2021.
• Ym mis Mai 2020, cyhoeddodd Llywodraeth y DU ddiweddariad ynghylch rhoi Egwyddorion Arweiniol y Cenhedloedd Unedig ar Fusnes a Hawliau Dynol ar waith.
• Ym mis Ebrill 2020, cyhoeddodd Llywodraeth y DU y byddai’n datblygu strategaeth genedlaethol ar gyfer pobl anabl a fyddai’n cynnwys nifer o amcanion trawslywodraethol i atgyfnerthu polisi a chyfranogiad pobl anabl wrth ddatblygu polisi.
• Yn 2019, cyhoeddodd Llywodraeth y DU y byddai’n cyflwyno strategaeth i fynd i’r afael ag anghydraddoldebau sefydledig a wynebir gan Sipsiwn, Roma a Theithwyr.
• Yn 2019, cyhoeddodd Llywodraeth y DU ei chynllun ar gyfer cydraddoldeb rhwng y rhywiau ynghyd â fframwaith ar gyfer mesur cynnydd.
• Yn 2018, sefydlodd Llywodraeth y DU ‘ganolfan cydraddoldeb’. Fel rhan o hyn, symudwyd Swyddfa Cydraddoldebau’r Llywodraeth i Swyddfa’r Cabinet yn barhaol, ynghyd â’r Uned Gwahaniaethau ar sail Hil, a chryfhawyd cysylltiadau â’r Uned Anableddau. Yn 2020, cyhoeddodd y byddai’r Comisiwn Symudedd Cymdeithasol yn cael ei leoli yn y ganolfan cydraddoldeb hefyd.
• Yn 2018, cyhoeddodd Llywodraeth y DU ei Chynllun Gweithredu LHDT, gan nodi ei hymrwymiadau polisi i wella cydraddoldeb ymhlith pobl lesbiaidd, hoyw, deurywiol a thrawsryweddol (LHDT).
• Yn 2017, sefydlodd Llywodraeth y DU Grŵp Gweithredu ar Gonfensiwn y Cenhedloedd Unedig ar Hawliau’r Plentyn, sef grŵp sefydlog a gaiff ei gyd-gadeirio gan yr Adran Addysg a Chynghrair Hawliau Plant Lloegr, er mwyn rhoi argymhellion y Cenhedloedd Unedig ynghylch hawliau plant ar waith.